سلسلة مقالات للدكتورة ناعمة

[b]
2- الزوجة الواثقة من نفسها لا تسأل زوجها باستمرار إن كان يحبها أم لا، بل تتصرف وكأنها امرأة يصعب أن لا يحبها رجل، وأنها مثيرة وذكية، وحبوبة، وتثق في أنها تثير الحب، وأن زوجها معجبا بها حتى وإن كانت متأكدة من أنه لا يحبها.




برضة دي من الحاجات اللي الزوجات بتقع فيها ، وتقعد بتسأل جوزها كل شوية ، انتي بتحبني؟ ، طب بتحبني قد اية؟ طب انا عاجبك ؟ بمجرد سؤالك بس ، بيخلية يحس انك ما عندكيش ثقة في نفسك ، وانك عاوزة طول الوقت دعم منه انه يفضل يقولك بحبك قوووي وبموووت فيكي

خليكي واثقة من نفسك ، وخليكي تقيلة على جوزك ، وخلية هو اللي يطلب منك الكلمة دي ، ويسألك .

تعرفوا يا بنات امتى حتعملوا الكلام دة ، لما تحبي نفسك وتدلعيها ، وتحسي بقيمة نفسك وان اي راجل يتمنى انه يرتبط بيكي لانك جوهرة ، لما تحبي نفسك وتدلعيها مش حتفرق معاكي ان جوزك يقولك كلام حلو او لا ، وعلى فكرة حتلاقية هو اللي حيشبعك كلام حلو ، لانه حيحس انك بعيدة عنه وان فيه حاجات تانية شغلاكي ، بس مش معني كدة اننا نطنش اجوازنا وحنقول هما اللي حيجروا ورانا ، لا انا قصدي انك ما تقفيش لجوزك على الواحدة ، ما تخليش جوزك محور حياته

لما الراجل بيتجوز بتبقى مراته جزء من حياته ، لكن الست بتتجوز بيبقى جوزها كل حياتها ، احنا عاوزين نبقى زيهم ونخلي اجوازنا جزء من حياتنا

[b]

3- بعد الزواج، وعندما تشعر المرأة بذلك الحب الكبير من زوجها، والإحتواء الدافيء، ترغب في ان تشكو وتفضفض، لتشعر منه بالتعويض والطبطبة، والتأييد، وغالبا ما تشكو من اهلها، وأقاربها، معتقدة أن هذا سيقربه منها، والصحيح ان تتجنب المرأة أي حديث سيء عن أهلها مهما بلغت مشاكلها معهم،
وان تمتدحهم وتمتدح علاقتها بهم، ليبقى ينظر لها باحترام وتقدير.


ودي فيه كتير من البنات بيعملوها ، ان اي مشكلة مع اهلك تروحي تجري على جوزك او خطيبك وتشتكيلة ، ودة اكبر غلط بتعملة البنات ، لانك بكدة بتقللي من قيمة اهلك وهيبتهم قدام جوزك .

مع الوقت من كتر شكوتك منهم جوزك حيمل ، وغير كدة مش حيعملهم اي اعتبار ولا هيبة ، يعني لا قدر الله لو حصلت مشكلة بينك وبين جوزك ، ووقولتي لجوزك انا حاكلم اهلي مش حيخاف منهم ولا حيعملهم اي حساب ، لكن لو انتي عاملة مكانة لاهكك قدام جوزك حيبقى عاملهم حساب في حضورهم وغيبتهم .

لازم تحسسي جوزك انك دلوعة باباكي ومامتك ، وانهم كانوا مسمينك فاكهة البيت والعسولة بتاعتهم ، وانك كنتي مدللة في بيت اهلك ، عشان يحس انك انتي قد اية رقيقة وانه متجوزة بسكوتة ولازم يحافظ عليها ومايكسرهاش.

ولا تحكي لجوزك عن مشاكل بيت اهلك ، لو فيه مشكلة بين اخواتك او بين اعمامك ، اوعي تروحي تحكي وتفضفضي ، دة برضة غلط ، خلي جوزك يعتبر بيتكم دة شئ مقدس ما ينفعش يتكلم عنة باي حاجة وحشة او مهينة .

ولو في مرة اتكلم اعملي زعلة كبيرة عشان جاب سيرة اي حد من اهلك بطريقة مش حلوة

[b]
4- لا تتحدثي أمامه عن الصفات الجميلة لأمرأة اخرى، فالمرأة الراقية لا تمتدح الاخريات امام زوجها، كما لا تذمهن، ولا تتحدث عن نساء اخريات لثقتها المطلقة في نفسها، ورضاها عن ذاتها.



اياكي انك تتكلمي عن واحدة صاحباتك قدام جوزك ، وتقعدي تمدحي فيها ، وتقوليلة دي امورة قووووي ، دي كريمة جداً ، دي شاطرة في المطبخ ولبسها شيك قووي ، دي بتروح الكوافييرة كل يوم مش عارفة بتصرف فلوسها على الفاضي

لان جوزك بسهولة حيبدأ يقارن بينك وبين صاحبتك وحيحس ان فيه صفات في صاحبتك كان يتمناها تكون فيكي ، وبكدة حتلاقي بطريقة لا ارادية حيبدأ يفكر في صاحبتك ويسألك عنها من الوقت للتاني ، او يتمنى ان يسمع سيرتها ويعرف اخبارها

وبرضة ما تتكلميش عن عيوب صحابك او مشاكلهم ، لان ممكن من خلال مشاكلهم يتعاطف معاهم ، ويعمل نفسة الفارس المنقذ ويتكلم مع صاحبتك ، او ممكن تصعب علية ويبقى متمني انه يحللها المشكلة بتاعتها ، والله اعلم اية اللي ممكن يحصل بعد كدة.

وبرضة ما تحكيش عن عيوبها لان ممكن يحس انك مغرورة وما فيش حد عاجبك ، عشان كدة خليكي محايدة لا تعيبي على حد ولا تمدحي حد ولا تحكي لجوزك مشاكل اصحابك

اكيد كلكم فاكرين فيلم سعاد حسني ورشدي اباظة وهناء ثروت ، شفتي بالرغم ان مراته كانت دلوعة وحلوة ، وهى ما خونتش صاحبتها وجابتها تعيش معاها ، لكن الراجل راجل ، ما فيش فايدة فية ، لو اتديلة الفرصة مرة يبقى قولي على نفسك يا رحمن يا رحيم

[b]- تجنبي تحمل مسؤولياته، او إبداء قدرتك على تدبر كل امور حياتك وحدك، اشعريه حاجتك إليه، وأن هناك امورا لا تتم بدونه، وأنك ضعيفة او غير قادرة على القيام ببعض الأمور بمفردك.

دي برضة من الحاجات اللي بتقع فيها البنات ودي بتبقى اكبر مشكلة اللي بتبقى صعب حلها ، عشان الجوز بيكون اتعود على تحملك للمسئولية مكانه ، لان الواحدة اول الحواز بتبقى عاوزة تبين لجوزها هى قد اية متحملة مسئولية وانها سبع رجالة في بعض، وتقولة ما لكش دعوة بالخضار والبقالة هات انت بس الفلوس وانا حاتصرف وهلم جر

جوزك لازم يحس انك دلوعة مش راجل بيشيل ويحط في البيت ، طبعاً معظم البنات دلوقتي هما اللي بنزلوا يشتروا الخضار ووبيطلعوا بالاكياس على قلبهم لحد الشقة ، انتي طبعا اللي بتدودي العيال المدرسة وبتذكريلهم ، انتي طبعاً اللي بتغيري جلدةالانبوبة وتسلكي الاحواض وتشيلي الانبوبة نقلي اثاث البيت قدامه ، ولا كانك شمشمون الجبار ، وهو تلاقية قاعد قدام التليفزيون الانتوخ الاعظم ، طبعا حد يلاقي راحة وما يستريحش

طب فين انوثتك لما بتعملي كل دة قدام جوزك ، فين رقتك ودلعك ، لازم تعودي جوزك انه يشاركك ،على الاقل في الحاجات اللي هى مسؤليتة ، زي شراء الخضار والبقالة ، تغيير الانبوبة وشيلها ، هو يودي العيال المدرسة وانتي ذاكريلهم

لازم يحس انك رقيقة ودلوعة ، يعني لما تيجي تشيلي حاجة تقيلة قوليلة اي صباعي اتعورت ، واقعدي طول اليوم عمالة تغسلي في صباعك وتحطي مطهر ، وكل شوية قوليلة صباعي واجعني عشان يعرف انك رقيقة.

عودية هو اللي يقشرلك البرتقال ويفتحلك علبة العصير ، عشان يحس قد اية انتي بسكوتة ، صدقيني الرجالة بتموت في الحركات دي .

بس لو انتي بقالك فترة متجوزة يبقى لازم تعودية بالتدريج عشان ما يحسش انك بتمثلي ، يعني لو حتشيلي حاجة قدامة ودي طبعاً عادة عاوزين نبطلها اننا ما نشتغلش واجوازنا قاعدين ويشوفنا واحنا عاملين زي طرزان ، اعملي نفسك بتشيل ترابيذة او بتجوري السفرة قوليلة اه ضهري مش قادرة افرده الحقني يا بيبي ، حيقوم طبعاً جري عليكي وقوليلة قعدني انا مش قادرة اعدل ضهري، واقعدي يجي شوية على الكرسي تعبانة ومش قادرة تفردي ضهرك وممكن تخلية ينومك في السرير ونامي شوية يجي ساعة او اكتر ، ولما تصحي اعملي نفسك احسن شوية بس لسة ضهرك بيوجعك ، وهو حتلاقية يقولك ما تشليش حاجة تقيلة تاني لوحدك .

بس وبعد كدة عودية كل ما تحبي تنقلي حاجة خلية يساعدك بس مش على طول عشان الرجالة خلقها ضيق ، بس احنا حبينا نوريهم اننا احنا قد اية رقيقين ومش بنقدر نشيل زيهم حاجات تقيلة



هاااااااااا اية رايكم حاجات جميلة
يالا يا ستات ادلعوا
على اجوازكم
اكملكم بكرة بااااااااااااااى